Alai Batzan ume bezala hasi ondoren, begirale moduan jarraitzeko erabakia hartzearen zergatia garbi dute begiraleek. Ume bezala jaso eta bizi zuten guztia oraingo haurrei transmititzearen garrantzia azpimarratzen dute. Edozein begirale boluntariori galdetuz gero, hau izango da jasoko den erantzunik esanguratsuena: Eman doan, doan jaso duzuna.
Hala ere garbi dute ez dela musu truk egiten dutena. Egia da ez dutela zentimo bat ere jasotzen, baina beraien lanaren trukean jasotzen dutena dirua baino askoz ere aberasgarriagoa dela diote, umeen irriak, umeen zoriontasunaren lekuko izatea da jaso dezaketen gauzarik baliotsuena. Hau da Alai Batzan gaur egungo begiraleen eta begirale ohien sentimendu nagusia. Umeen bidelagun izateak begiraleei pertsona bezala hazten laguntzen dietela ere esaten dute.
Hainbat bizipen ere elkartrukatu zituzten. Esaterako lehenengo kantaldiaren antolakuntza eta arrakasta. Umeentzako berria zen zerbait egiteak haurren parte hartze handia suposatu zuen, 18 kanturen laguntzarekin hainbat haurrek On Bosco antzokia gainezka egitea lortu zuten. Proiektu hau aurrera eramatea erabaki zenean, Alai Batzak ez zituela gaur egun dituen baliabide guztiak, baina hala ere aurrera ateratzea lortu zuten, elkarlanean.
Bitxikeri moduan Kristina Arrizabalagak beraien lehenengo kluben topaketan bizitako momentu barregarri bat kontatu zuen. Azkotitik lau begirale joan ziren haurrez betetako autobus batean Deustura. Kluben tokapaketako antolatzaileek begiraleek mozorrotuta joan behar zutela esan zuten eta Azkoitiarrei esan eta hauek egin. Bertara iritsi zirenean mozorrotuta zeuden begirale bakarrak ziren. Oroitzapen ederrak dituztela garbi geratu zen.
Ekonomiaren garrantziaz ere hitz egin zen. Izan ere Alai Batzak diru laguntzei esker da segitzen du aurrera hein handi batean. Gaur egun, guraso elkarteak, udaletxeak, salestarrek... laguntzen diote, sarrera kuotak ez baititute material kosteak berdintzen.
Alai Batzaren etorkizunaren inguruan guztiek iritzi berdina adierazi zuten. Alai Batzak aurrera jarraitzeko hasieratik dituen helburuak, baloreak... mantendu behar dira, horiek egin dutelako Alai Batza gaur dena. Gizartea aldatuz doan heinean begiraleek ere moldatu egin beharko dute, baina Alai Batzaren muinak tinko mantenduz lortuko da beste horrenbeste urte irautea.
Erakundeen laguntza eta pertsona askoren lan isila eskertuz amaitu zen saioa. Giro bikaina izan genuen. Saioaren hasieran, kanpoan, ekaitzaren ondoren ostadar zoragarria ikus zitekeen.
XXVIII. Kultur Jardunaldien hirugarren eta azken saioa KANTU JIRA izango da, Floreagako euskararen normalkuntza taldearen laguntzaz. Maiatzaren 25ean, osteguenan, herriko kaleetan zehar euskarazko gaurko eta aspaldiko kantuak abestuko dira. Entseguak martxan daude. Egun hartan taldearekin kantzera gonbidatzen zaituztegu guztiak.
