Azkoitiko Udalaren eta Gipuzkoako Foru Aldundiaren eskutik, larunbatean hasiko da Udaberriko Musikaldiaren 33. aldia Santa Kutz komentuan. Ohi bezala, maiatzeko lau larunbatetan musika doinuek hartuko dute hango eliza 18:30etik aurrera, herrian "musika hitzordu handienetarikoa" bihurtu den zikloari esker. "Hiru hamarkadatik gora daramatza bizirik zikloak, eta egun, Azkoitiko musika hitzordu handienetarikoa da. Musika onaren maitaleei eta entzumenarentzat plazer bila dabiltzan guztiei zuzendutako gonbidapena da”, esan du Kultura zinegotzi Sonia Vazquezek.
2016an Elgoibarren sortutako Musbika Ensemble ganbera musika taldeak irekiko du zikloa larunbatean. Antolatzaileen arabera, musika klasikoa eta antzinako musika "pertsona ororengana iristeko eszenaratze freskoa eta dinamikoa” eskaintzen du taldeak, eta Antonio Gaztañetaren bidaia lana aurkeztuko du hark Azkoitian: "Testu dramatizatu eta musikaren bitartez, Musbika Ensembleak Gaztañetaren itsasontzian bidaiatzeko aukera eskaintzen du. Tripazko sokek, klabeak, arku barrokoak, larruzko estalkiek eta barroko garaiko kriterio historikoekin interpretatutako musikak Gaztañetaren garaiko Mutrikura eramango gaitu, bidaiari ekiteko”.
Hilaren 17ko kontzertuan, berriz, Andreas Prittwitz musikari eta diziplina anitzeko artista alemaniarra izango da protagonista. Artistak Arteen Serondoya saria jaso zuen 2018an, kultura-berrikuntzagatik. Orain, berriz, Panamericana oholtzaratuko du Lookingback proiektuaren barruan. Inprobisazioak eta erritmo folklorikoak nahastuz eta melodia eta tinbre barrokoen ukituarekin, musikariak Ipar Ameriketako jazzera eramango du publikoa.
Hilaren 24an, bestalde, Mixel Etxekopar eta Iñar Sastre musikariek Ravelen doinuen inguruko inprobisazioak kontzertua eskainiko dute. “Naturaren soinu zaharrenek musika garaikidearekin egingo dute topo inprobisazio musikalaren bidez. Horretarako, euskal instrumentu tradizionalak eta pianoa erabiliko dituzte, Maurice Ravelen iruditegian egin ohi zuten bezala".
Aurten, Suhar abesbatza arduratuko da egitaraua ixteaz, eta taldeak Santa Kutz: Fedea eta Natura kontzertua eskainiko du hilaren 31n. Esteban Urzelaik zuzenduko du korua, eta Amaia Zipitria piano jotzaileak ere parte hartuko du zuzenekoan: "Euskal Herriko gizon-abesbatzen ondarea jaso eta tradizioa eta modernitatea lotuz, gizonezkoen koruek musika sorkuntzan eta kultur ekoizpenean leku paregabea izango duten etorkizunaren oinarriak eraiki nahi ditu abesbatzak", esan du udalak.
Ohi bezala, doakoak izango dira kontzertuak, eta emanaldietara joateko doako autobus zerbitzua ere jarriko du udalak. Larunbatero, 18:00etan abiatuko da autobusa Julio Urkixo kaleko 7. zenbakiko geralekutik —Eroski Consum ondoan—, eta kontzertua amaitzean, herrigunera itzuliko da. Autobus zerbitzua erabiltzeko ez dago aurrez izena eman beharrik.