Azkoitiko Babes Sarea (ABS) martxan da. Osasun arazo neurodegeneratiboak dituzten herritarrei eta horien senitartekoei zaintzan laguntza eskaintzea xede duen sarea da ABS, eta talde hori sustatu duten herritarrek sarea sortu aurretik egindako bidea zein izan den, egun zein egoeratan aurkitzen diren eta aurrera begira egin beharreko pausoak zein diren azaldu zuten atzo. Elkarguneko Oteiza aretoan bildu ziren hogei bat lagun.
Herrian gaixotasun neurodegeneratiboren bat duen gero eta pertsona gehiago dagoela jakitun, hainbat lagun kafe baten bueltan hasi ziren kezka horri lotutako hausnarketak eta bizipenak elkarbanatzen. Hain justu, hiru kide izan ziren pertsona eta familia horiei zuzenduta laguntza edo babes sare bat herrian sortzeko aukera mahai gainean jarri zutenak. Batetik, Gipuzkoako senitartekoen, lagunen eta alzheimerra edo beste dementziaren bat duten pertsonen Afagi elkartea, eta bestetik, Debabarrenan parkinson gaixotasuna dutenen eta horien familien bizi kalitatea hobetzea helburu duen Deparkel elkartea hartu zituzten erreferentziatzat. "Oso egoera zailak dituzte zenbait familiak; gaixotasunak aurrera egiten du inolako errukirik gabe, eta familia askotan, batetik, kariñoa sentitzen da, baina, bestetik, 'karga' ere bai. Zaila da eguna joan eta eguna etorri familia edo pertsona bakar batek egoera hori kudeatzea", azaldu zuen Karmen Irizarrek, babes sarearen sustatzaileetako batek.
Afagi bezalako elkarteak "oso ondo antolatuta" egonagatik ere, elkarte horren egoitza Donostian dagoela azaldu zuen hark. Era berean, adierazi zuen bi astez behin Zarautzen ere izaten direla elkarte horren saioak, baina halako gaixotasun bat duen pertsona bat etxean izanda "ez da horren erraza" izan ohi familientzat mugitzea. Orduan hasi ziren sarea herrira ekartzeko edota talde bat Azkoitian bertan aktibatzeko pausoak ematen. "Herrian sortu nahi izan dugu gaitza etxean sartuta dutenentzako eta etorkizunean sortzen zaienentzako sarea".
Lanketari ekiteko, udalera jo zuten aurrena, eta han idatzi bat erregistratu zuten, udalbatza osatzen duten lau udal taldeei zuzenduz. Udal taldeak proposamena "oso alde" hartu zutela azaldu zuten atzo. Hori ikusita, martxa azkartzen hasi ziren sustatzaileak. Irizarrek esan zuen sarea "borondate onenarekin" ari direla sortzen, baina hanka sartzea "oso erraza" dela jakinda, bi formazio saio egin zituztela: lehen saioan, Afagi elkarteko teknikari baten azalpenak entzun zituzten bertaratu ziren familiek, eta bigarrenean, Deparkel saioko teknikari batena.
Boluntarioak, zutarri
Taldea pixkanaka-pixkanaka martxa hartzen joan da, harik eta taldetxo bat osatu duten arte. Boluntario sarea izango da "printzipioz" ABS taldea, eta jakinarazi zuten "gutxieneko sare bat" osatua dutela. "Hainbat lagunen telefonoak eta helbideak jaso ditugu, eta zortzi edo hamar lagun prest agertu dira dinamika honetan boluntario lana eginez astean pare bat ordutan gaixotasuna duten pertsonekin egoteko", esan zuten.
Pertsona horiekin egoteko, baina, lokala edo egoitza lortzea izan da egitasmoaren azken asteetako erronketako bat. Aurreikusi dutenez, Kultur Etxeko laugarren solairuko gela batean hasiko dira biltzen. Hasiera data ere iragarri zuten atzo: maiatzaren 12a, astelehena. Gainera, gaixotasuna duen pertsona batek lehen eguneko hitzorduan parte hartuko duela ere jakinarazi zuten.
Astelehenetan, 10:00etatik 12:00etara nahiz 16:30etik 18:30era elkartuko dira Kultur Etxean, eta asteazkenetan zein ostegunetan, 16:30etik 18:30era. Nolanahi ere, boluntario bezala laguntzeko prest egon daitezkeen herritarrei dei egin zieten atzo ABS taldeko kideek, astearteetan, ostiraletan edota asteazken zein ostegun goizetan txandak egitera animatuz.
Era berean, sustatzaileek azaldu zuten familia batzuek dagoeneko helarazi diotela taldeari gaixotasuna duen pertsona ez dutela zentro edo lokal batera eraman nahi, baizik eta pertsona hori kalean edo herrian izan nahi dutela. Hori hala izanda, ABS taldeak paseo bat emateko boluntario edo laguntzaileak ere lotu ditu. Atzo jakinarazi zutenez, sei bat boluntario daude gaixoekin herrian zehar paseoak egiteko prest, eta kasu horietan, boluntarioekin adostu beharko dute familiek hitzordua. Halaber, familia laguntzaileak eta tartean behin lagun dezaketen lagun batzuk ere identifikatu dituzte.
ABSko kideentzat garrantzitsua da harrera egin aurretik gaixotasuna duen pertsonak zer nolako beharrak edota nahiak dituen jakitea, eta horretarako, familiek beraiekin gaixoari buruzko informazioa elkartrukatzea ezinbestekoa izango da. Bide batez, aurreneko saioan familiek gaixoarekin batera parte hartzea ere funtsezkotzat jo zuten.
Antolatuta eta antolatzen
Aurrera begira, "antolatzea" izango da gakoa sustatzaileentzat; zer egunetan zer eta norekin egin erabaki beharko dute. "Familiengandik jasoko dugun erantzuna garrantzitsua izango da. Ziurrenik epe luzeko kontua izango da, martxan jartzea kosta egingo zaiona. Ahoz aho zabalduta emaitza polita eman dezakeen zerbait izan daiteke egitasmo hau", esan zuen Irizarrek.
Antolatzeko bide bezala, Whatsapp komunitate bat sortuko dute datozen egunetan, baina soilik taldearen informazioa helarazteko komunikazio bidea izango da hori. Gainera, oraingoz ez dute elkarte izaera hartuko; egitasmoak zer nolako dinamika hartzen duen ikusi nahi dute aurrena. "Hasi egingo gara, eta hilabete batzuk egingo ditugu modu honetan. Gerora ikusiko dugu egitasmoak zer nolako itxura hartzen duen", esan zuen taldearen beste sustatzailea den Julen Garatek. Egitasmoari buruzko informazio gehiago nahi duenak 636 35 40 33 (Irizar) edota 687 05 67 55 (Garate) telefono zenbakira deitu dezake.