Adin-adin egitasmoari lekukoa hartuko dio aurten Bertso birak, Gipuzkoako Foru Aldundiak eta Lankuk bertsoak adinekoen egoitzetara eramateko sortu duten egitasmo berriak. Programaren sortzaileen arabera, "bertsolaritzaren bidez adineko pertsonen bizi-kalitatea hobetzea eta gaitasun kognitiboak sustatzea" dira egitasmoaren helburu nagusiak, "bertsoa euskal kulturaren adierazpenik garrantzitsuenetariko bat dela kontuan izanda".
Ekimenak urte hauetan arrakasta izan duela nabarmendu dute haren sustatzaileek, eta bertso saioak hartzeko gero eta egoitza gehiago aurkeztu direla ere azpimarratu dute. Hori horrela, orotara 30 bertso saio antolatu dituzte Gipuzkoako adinekoen egoitzetan, tartean Azkoitiko San Jose egoitzan. Eneritz Artetxe eta Millan Telleria bertsolariek eskainiko dute saioa han, ostegunean, 17:00etan hasita.
Maite Peña Zaintza eta Gizarte Politiketako diputatuaren iritziz, bertsolaritza "oso tresna indartsua" da adinekoen emozioekin konektatzeko. "Saioek, entretenimendua eskaintzeaz gain, musikaren eta bertsoen bidez oroitzapenak eta bizipenak aktibatzen ere laguntzen dute, eta hori oso onuragarria da egoitzetako erabiltzaileen ongizate emozionalerako zein kognitiborako", azaldu du Peñak.