Emun Euskal Herriko gizartearen garapenaren alde lan egiteko eta euskararen egoera normalizatzeko asmoz sortu zen. Bide horretan ari dira Naroa Olalde eta Igone Bastarrika Emuneko teknikari azkoitiarrak Serbitzu enpresan ere, 2011. urteaz geroztik. Iñaki Maiztegi legazpiarra Serbitzuko Euskara Planaren koordinatzailea da. «Gure bezeroekin euskaraz egiten ditugu harremanak», azaldu du Maiztegik. Hasieratik ikusi zuten lantegian euskararen inguruan arautegi bat ezarri behar zutela, hots, sistema baten barruan aritu beharra zutela ezer lortu behar baldin bazuten. «Zerbitzu publikoetan lan egiten dugu; udala ez bada, Foru Aldundia da gure bezeroa», jarraitu du koordinatzaileak. «Euskal Herriko herrietan ematen dugun zerbitzua euskaraz denez, garrantzia eman nahi izan genion euskarari, eta Emunekin hasteko ideia hortik etorri zitzaigun», dio, prozesuaren hastapenak azalduz.
Lantegiarentzat “ezustekoa” izan zela aitortu dute. «Ez ginen jabetzen zer egin behar genuen». Begi bistako gauzekin lotuta hasi ziren lehen urratsak egiten: errotulazioa aldatu, bisita txartelak euskaratu, zigiluak… Sistematika horrekin hasi ziren Serbitzun euskara plana bideratzen. Guztiari jarraipena emateko, euskara batzorde bat dute lantegian, «oso erakundetutako batzordea», koordinatzaileak eta teknikariek diotenez. «Normalean, ahulgune bat izan ohi da. Enpresa batzuetan, eskaera sindikatuetatik iritsi delako edo borondatezko talde batek urratsa egin duelako hasi ohi dira planarekin», adierazi dute Olaldek eta Bastarrikak. «Serbitzuk duen plana erakunde mailakoa da; haren indarguneetako bat da, eta zuzendaritza inplikatuta dago».
Lantaldeko kide gehienek euskara menperatzen dute, baina baziren gazteleraz bizi ziren langileak ere. Oro har, «jendeak ondo hartu zuen». Euskara batzorde horietan «alde positiboa erakusteari garrantzi handia» eman diotela azaldu dute. «Gehitu egiten duen zerbaiten moduan aurkeztu dugu, malgutasun handiarekin, neurgarriak eta lortzeko modukoak diren helburuak jarrita», adierazi du koordinatzaileak. Enpresak «asko baloratzen du» langileek euskaraz ikasi eta euren maila hobetzeko egiten duten esfortzua. «Langileek egiten duten lana aitortu beharra dugu», dio, azkenik, koordinatzaileak.
Bai Euskarari ziurtagiria eta Bikain zilarra lortuak ditu Serbitzuk. Bikainena «ezustekoa» izan zela esan dute. Beste aurrerapauso batzuk eman nahi zituzten, ordea. «Kalitatezko prozesuetan gertatzen den bezala, epe laburretan hobekuntza handiak egin ziren, baina, bihurgunearen goiko aldera iristean, zaila izaten da hobetzea. Hori gertatu zitzaigun guri», adierazi du Maiztegi koordinatzaileak. «Harea harrotu eta jendeari, langileei, aukera ematea erabaki genuen». Enpresan euskara barneratuta zen lehendik, baina, langile asko dutenez, eurek zuten euskararen ezagutza maila handitzea jarri zuten helburu. Euskara planaren oinarri metodologikoak hiru dira: erabilera, ezagutza eta motibazioa. «Helburua beti euskararen erabilera da», diote teknikariek. «Erabiltzeko, ezagutu egin behar da, eta, horretarako, giro ona sortu behar da».
Langileak, helburuak lortzen
Giro horren barnean murgildu ziren Aitor Ulibarri zuzendaria eta Ramon Donato de Lopez langilea. Ulibarri zuzendariaren ustez, «gai berria zen, eta esperientzia falta zuten». 2015. urtean hartu zuen zuzendari kargua Serbitzun, eta, langile gehienak euskaldunak zirela ikusita, plan hori lantzen jarraitzea garrantzitsua zela iritzi zion. Ulibarri gasteiztarra da jaiotzez, eta gazteleraz ikasitakoa; euskaldun berria da. «Euskararekin lotutako lehen esperientzia gogorrena hemen izan nuen, Serbitzun», azpimarratu du zuzendariak. Ulibarrirentzat, euskal enpresa bateko zuzendaria izanik, harremanak euskaraz lantzea oso da garrantzitsua. «Ez da gauza bera harremanak euskaraz egitea edo gazteleraz egitea, gertutasunagatik bereziki», gaineratu du. «Euskaraz egin nahi dugunok aukera izatea garrantzitsua da. Poliki-poliki, euskara lan hizkuntza izatea lortu behar dugu».
Ramon Donato de Lopez, berriz, Irunen jaiotakoa da. Euskara betidanik jaso duela baina gerora galdu egin zuela aitortu du. «Oso desberdina da Azkoitian edo Azpeitian bizi edo Irunen bizi. Orain dezente hartu diot euskarari», azaldu du langileak. Lan harremanak euskaraz egiten dituzte, bai bulegoan, bai telefonoz zein ordenagailuz. Euskaltegiak ematen duen B2 maila lortua du Donato de Lopezek, hau da, ahoz eta idatziz komunikatzeko gaitasuna aitortua du. Halere, hobetzen jarraitu nahi du, eta euskararen gaitasun agiria (EGA) lortzea du erronka. «Komenigarria ikusten dut nire profilarentzat eta lanpostuarentzat», azaldu du Azpeitian bizi den irundarrak. «Ez da gauza bera hitzez edo idatziz komunikatzea. Ez zaie berdin idazten langile bati edo teknikari bati, eta alor horretan indartu nahiko nuke». Euskara plana dutenen artean enpresa aitzindaria da Serbitzu Azkoitian. Lan eta erabaki askorekin egindako bidearen hastapena besterik ez da Azkoitiko lantegiak hasitakoa.
Hauek dira, besteak beste, Serbitzuko Euskara Batzordeak esku artean dituen lanak:
- Laneko barne dokumentuak euskaraz ere erabiliko direla ziurtatzea.
- Euskararen idatzizko erabilera areagotzeko trebakuntza pilulak hamabostean behin.
- Bezeroari Serbitzun euskararen erabilera areagotzeko egiten denaren berri ematea.
- Serbitzuko langileen ezagutzari jarraipena egiten zaio, prestakuntza beharrak detektatzeko eta ikasteko aukerak eskaintzeko.
- Euskara ikasten ari diren langileei jarraipena egiten zaie .
- Bikain ziurtagiriaren autoebaluazioa egiten da aldiro (zilarra lortuta).
- Bai Euskarari Ziurtagiriaren helburuei jarraipena (2016an hartutako konpromisoak).
- Hizkuntza ekologian trebatzeko ginkana edo lehiaketa bat dago martxan (maiatzetik ekainera, 5 astez).
- Euskararen eguna ospatzen da abenduaren 3an.